Litteratur for barn og unge 2004 Per Olav Kaldestad

Ungdomslitteraturen er det sentrale temaet i 2004-årboka. Frå ulike vinklar analyserer årboka sentrale verk av ungdomsbokforfattarar som Harald Rosenløw Eeg, Jostein Gaarder og Hege Follegg Pedersen.

Rune Belsvik, Kari Sverdrup og Jon Ewo fortel i eigne essay om kva dei tenkjer om det å skrive for ungdom, og årets forfattarportrett presenterer Bjørn Sortland. Med ei vurdering av Harry Potter-suksessen og Lene Kaaberbøls Skammar-serie er fantasylitteraturen også med i biletet, og dessutan fortidas spenningslitteratur, representert ved flygarhelten Biggles.

Årboka presenterer dessutan aktuell kritikk og ny forsking frå universitet og høgskular; m.a. drøftar ein artikkel identitetsprosjektet i ungdomsboka, og gjennom ei leseundersøking får vi innblikk i kva 10-klassingar ønskjer seg av litteraturen.

Forutan artiklar, essay og kritikk inneheld årboka også statistikkar og bibliografi over barne- og ungdomslitteratur og -forsking, liste over litterære prisar og dessutan nyttige adresser. Dette unike materialet gir ei totaloversikt over barne- og ungdomslitteraturfeltet og er utarbeidd av Norsk barnebokinstitutt (www.barnebokinstituttet.no)

Årboka Litteratur for barn og unge er ei nyttig handbok for lærarar, studentar, bibliotekarar, kulturarbeidarar, litteraturskribentar, forfattarar og alle andre som arbeider med og interesserer seg for barne- og ungdomslitteratur.